ಕಾಡುವ ನೆನಪು

ಕಾಡುತಿಹುದು ನಿನ್ನದೆ ನೆನಪು
ಬೇಡುತಿಹುದು ನಿನ್ನನೆ ಮನಸು
ನಿನ್ನ ಒಲುಮೆಯಿಂದಲೆ ಬಾಳು
ಬೆಳಕಾದಂತೆ ಕನಸು
ನಿನ್ನ ಸ್ನೇಹದಿಂದಲೆ ಬಾಳು
ಹಸನಾದಂತೆ ಕನಸು
ಮತ್ತೆ ಮತ್ತೆ ಕಾಡುವ ನೆನಪು
ಎಲ್ಲ ದೇವರ ಬೇಡಿದೆ ಮನಸು
ನಿನ್ನ ನಗುವಿನಿಂದಲೆ ಬದುಕು
ಸಿಹಿಯಾದಂತೆ ಕನಸು
ನಿನ್ನ ಪ್ರೇಮದಿಂದಲೆ ಬದುಕು
ಸಾರ್ಥಕವಾದಂತೆ ಕನಸು

ಆಶಯ

ಬಾಡಿದಾ ಮೊಗದಲ್ಲಿ
ಬತ್ತಿದಾ ಎದೆಯಲ್ಲಿ
ಜೀವ ಭಾವದ ಸೆಲೆಯ
ಮತ್ತೆ ಮೂಡಿಸುವಾಸೆ
ಕರಗಿದಾ ಕನಸನ್ನು
ಮುದುಡಿದಾ ಮನಸನ್ನು
ತಟ್ಟಿ ತೆರೆಯುವ ಆಸೆ
ಸೊರಗಿದಾ ಸೊಬಗನ್ನು
ಮರೆತಿರುವ ನೆನಪನ್ನು
ಕೆದಕಿ ತೆಗೆಯುವ ಆಸೆ
ಕತ್ತಲಲೆ ಕಳೆದಿರುವ
ನೆತ್ತರಲೆ ಬೆಳೆದಿರುವ
ಮುಗ್ಧ ಜೀವಿಗಳನೆಲ್ಲ
ಸಂತೈಸುವ ಆಸೆ
ದುಃಖ ತುಂಬಿದ ಬದುಕು
ದಿಕ್ಕು ಕಾಣದ ದೋಣಿ
ದಡವ ಸೆರಿಸುವ ಆಸೆ

ಅಭ್ಯುದಯ

ಇರುಳು ಕಳೆದು
ಬೆಳಕು ಹರಿಯಲಿ
ಬಾಳ ಕತ್ತಲೆ ಕಳೆಯಲಿ
ನಿನ್ನ ನಗುವಿನ ಒಂದು ಕಿರಣದಿ
ಬದುಕು ಧನ್ಯತೆ ಪಡೆಯಲಿ
ಮೋಡ ಸರಿಯಲಿ ಬಾನು ಬೆಳಗಲಿ
ದೇವ ದರುಶನವಾಗಲಿ

ಶುಭ್ರ ಬದುಕಿಗೆ ನಾಂದಿಯಾಗಲಿ
ಭವ್ಯ ಭಾವನೆ ಬೆಳೆಯಲಿ
ಸ್ನಿಗ್ದ ಚೆಲುವಿನ ರೂಪ ಮೂಡಲಿ
ರಂಗಿನೋಕುಳಿ ಬೀರಲಿ
ತಂಪುಗಾಳಿಯು ಕಂಪು ಸೂಸುತ
ಧರೆಯ ಸ್ವರ್ಗವ ಮಾಡಲಿ
ಮನದ ಮೌಢ್ಯವ ತೊಳೆಯಲಿ


- ಲಕ್ಷ್ಮೀಶ ನಡಹಳ್ಳಿ
ಬೆಂಗಳೂರು

ಸಂದಿಗ್ಧ

ಭಾವಗಳು ನೂರುಂಟು
ಹೃದಯಾಂತರಾಳದಲ್ಲಿ ಭಾವಗಳು ನೂರುಂಟು
ಆದರೇಕೋ ಅವಕಿಲ್ಲ ಜೀವ
ಪ್ರೀತಿ ಹೃದಯವೇ ದೂರಾದ ಮೇಲೆ
ಅವಕೆಲ್ಲಿಂದ ಬಂದೀತು ಜೀವ


ನೋವುಗಳು ನೂರೆಂಟು
ಮನದಾಳದಲ್ಲಿ ನೋವುಗಳು ನೂರೆಂಟು
ಆದರೇಕೋ ಅವಕಿಲ್ಲ ಸಾವ
ನೋವುಗಳೆಲ್ಲ ಉಸಿರಲ್ಲೆ ಬೆರೆತಿರುವಾಗ
ಬಂದೀತಾದರು ಅವಕೆಲ್ಲಿಂದ ಸಾವ


- ಲಕ್ಷ್ಮೀಶ ನಡಹಳ್ಳಿ
ಬೆಂಗಳೂರು

ಮಮತೆಯ ಮಡಿಲು

ಮರಿ ಹಕ್ಕಿ ರೆಕ್ಕೆ ಬಿಚ್ಚಿ
ಹಾರಿತ್ತು ಬಾನ ನೆಚ್ಚಿ
ಸಹಿಸೀತೆ ತುತ್ತನಿತ್ತು
ಸಲಹಿದಾ ತಾಯಿ ಹಕ್ಕಿ

ತಿರುಗಿತು ರೆಕ್ಕೆ ಬಡಿದು
ಬಾನಲ್ಲೆ ಗಿರಕಿ ಹೊಡೆದು
ಬಳಲಿತು ಪುಟ್ಟ ದೇಹ
ನೆನೆಸಿತು ತಾಯಿ ಮೋಹ

ಬಾಯಾರಿ ದೂರ ಅಲೆದು
ಹೊಳೆಯಲ್ಲಿ ನೀರ ಕುಡಿದು
ಕುಳಿತಿತ್ತು ಮರದ ಮೇಲೆ
ಮನದಲ್ಲಿ ನೆನಪ ಮಾಲೆ

ಏಕಾಂತದಾಸೆ ಬತ್ತಿ
ಗೂಡಿನಾ ನೆನಪು ಒತ್ತಿ
ಕಂಡಂತ ಕನಸು ನೂರು
ಕನಸೆಲ್ಲ ಚೂರು ಚೂರು

ಮರಳಿತು ತಾಯ ಅರಸಿ
ಕಂಬನಿಯ ಕೋಡಿ ಹರಿಸಿ
ಕುಳಿತಿತ್ತು ಅಳುತ ತಾಯಿ
ಮರಿಹಕ್ಕಿ ಬರುವ ಬಯಸಿ

- ಲಕ್ಷ್ಮೀಶ ನಡಹಳ್ಳಿ
ದಿ: ೦೬/೦೩/೨೦೦೭,
ಬೆಂಗಳೂರು